كتب / رائد قديح
خربشاتي هذه المرة مختلفة فهي قصيدة شعر من كلماتي بالعامية بعنوان (حلم)
وهي عبارة عن لوحة شعرية بسيطة ترسم مشاهد كنت قد رأيتها وانا جالس انتظر صديق في محطة مترو الشهداء اخذت تعابيرها من معالم وجوه رواد المترو واتمنى ان اكون قد وفقت في وصف المشاهد بدقة .
ناس رايحة وناس جاية
وناس شايلة امل بكرا
وناس الضحكة بهتانة
بتتعارك مع الايام
وناس الفرحة ملياها
وناس الحزن خاطفها
وناس تايهة في وسط زحام
ناس شايلة وفي ايديها فراخ وحمام
وناس اللقمة مش لاقية
ولا حتى مع الاحلام
يا دنيا ليه معندانا
وحالفة تيجي ع الغلبان
لا منك فرحة تسعدنا
ولا فيك يا دنيا امان
قرفانا في عيشتنا
ساكنانا في ملح العيش
راسمانا ف ملامحنا
حرمانا في يوم نعيش
بحلم اكل اللحمة
مع الفتة بعيش ناشف
على شوية بصل اخضر
وايه يعني ما انا بحلم
سيبوني احلم شوية
مع شوية عسل صافي
وعيش شامي
وجبنة أريش
آاااه يا دنيا غدارة
يا رميانا مابين تروسك الدايرة
ومابين فجرك النايم
ولا حالم في يوم يصحى
ولا شمسك في يوم تشرق
ولا حتى عشان نعيش … انتهى المشهد
